ShQO-da qurylysy aıaqtalmaı turǵan áskerılerge arnalǵan úı súrilýi múmkin

<p>ÓSKEMEN. KAZINFORM &ndash; Shyǵys Qazaqstan oblysynda qurylysy aıaqtalmaı turǵan áskerı qyzmetkerlerge arnalǵan kópqabatty úı súrilýi múmkin.</p>

Altaı aýdandyq №2 sotynda aýdan ákiminiń jyljymaıtyn múlikti kommýnaldyq menshik dep taný týraly aryzy boıynsha azamattyq is qaraldy.

Nysan Serebrıansk qalasynda ornalasqan. Bul – qurylysy aıaqtalmaı turǵan áskerılerge arnalǵan kópqabatty úı. Qarjy tapshylyǵyna baılanysty úı qurylysy 1999 jyly toqtatyldy.

«Tıisti túrde konservatsııalanbaǵandyqtan jáne uzaq ýaqyt qurylysy toqtap turǵandyqtan, ǵımaratta aqaýlar paıda boldy. Nátıjesinde ol qaýipti dep tanyldy. Nysanǵa menshik quqyǵy eshkimge tirkelmegen», - dep habarlady sottyń baspasóz qyzmeti.

2021 jyldan bastap ol ıesiz múlik retinde esepke alyndy. Endi ǵımaratqa demontaj jasalýy tıis.

Sot Altaı aýdany ákiminiń aryzyn qanaǵattandyrdy. Úkim áli zańdy kúshine engen joq.