ShQO-da kúnine 11 myńǵa jýyq adam vaktsına alýda
Aımaq basshysy Danıal Ahmetov emhanalardyń bas dárigerlerimen, qala, aýdan ákimderimen halyqty vaktsına saldyrýǵa tartý jumystary boıynsha keńes ótkizdi.
Qazirgi ýaqytta óńirde 11 myńǵa jýyq adam kún saıyn koronavırýsqa qarsy vaktsına alyp jatyr. Bul Qazaqstan boıynsha eń joǵary kórsetkish.
«Jańa oqý jylynyń bastalýyna sanaýly kúnder qaldy. Biz balalardyń jappaı vırýs juqtyrýyna jol bermeýimiz kerek. Vaktsına salýǵa memlekettik tapsyrys alǵan emhanalardyń qandaı da bir medıtsınalyq mekemege tirkelgen adamdarmen durys jumys isteýin baqylaý qajet. Buny qala men aýdan ákimderi, Densaýlyq saqtaý basqarmasy jáne Mindetti áleýmettik medıtsınalyq saqtandyrý qorynyń óńirlik fılıaly qadaǵalaýy tıis», - dedi Danıal Ahmetov.
Sondaı-aq ol egpe salý naýqanyna qatysty esepti kúnine eki ret koronavırýs ınfektsııasynyń taralýyna tosqaýyl qoıý jónindegi keńeste tyńdaıtynyn eskertti.