ShQO-da kópbalaly otbasylarǵa arnalǵan úılerdiń sapasy tekserildi
Aımaq basshysy Danıal Ahmetov Kókpekti aýdanyna jasaǵan jumys sapary barysynda «Aýyl el besigi» baǵdarlamasy aıasynda boı kótergen jańa sport keshenine bas suqty. Bul ortalyqta kez kelgen sport túrimen aınalysý úshin barlyq jaǵdaı jasalǵan (fýtbol, basketbol jáne voleıbol alańdary, júgirý joldary, jekpe-jek zaldary). Kıim aýystyratyn yńǵaıly bólmeler jabdyqtalǵan. Sondaı-aq úlken avtoturaq pen balalar oıyn alańy da bar.
«Bul joba turǵyndar arasynda úlken qyzyǵýshylyq týdyrdy. Sondyqtan ony Shyǵys Qazaqstannyń burynǵy 13 aýdan ortalyǵynda júzege asyramyz», - dedi oblys ákimi.
Sapar barysynda ol kópbalaly jáne az qamtylǵan otbasylarǵa satyp alý úshin jeke ınvestorlar esebinen salynǵan úılerdiń jaǵdaıymen tanysty. Bespáterli úıden baspana alǵandardyń biri – tórt balanyń anasy Mádına Qojahmetova. Óńir basshysy kópbalaly otbasyn kele jatqan Naýryz merekesimen quttyqtap, búldirshinderge syılyqtar tabys etti.
Sonymen qatar Danıal Ahmetov101 oqýshy bilim alatyn Bastaýshy jáne 320 bala oqıtyn Samar aýyldarynda ornalasqan eki mektepte boldy.
«Bastaýshy aýylyndaǵy Abaı atyndaǵy orta mektepte oblystyq bıýdjet esebinen jasalǵan kúrdeli jóndeý jumystarynyń sapasy jaqsy. Samar №1 orta mektebinde kompıýterler sany jetkilikti. Búginde Shyǵys Qazaqstannyń bilim shańyraqtary elimizde kompıýterlik tehnıkamen eń jaqsy jabdyqtalǵan oblys. Bıyl taǵy baǵdarlamalaýdyń ozyq túrlerin oqytý boıynsha jańa baǵdarlama iske qosylady», - dedi aımaq basshysy.