ShQO-da kólik ınspektsııasynyń 7 qyzmetkeri jemqorlyq úshin ustaldy

ÓSKEMEN. QazAqparat – Shyǵys Qazaqstan oblysy boıynsha kólikti baqylaý ınspektsııasynyń 7 qyzmetkeri jemqorlyq qylmysy úshin ustaldy, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttigi ShQO boıynsha departamenti taratqan málimetke súıensek, oblystyq kóliktik baqylaý ınspektsııasynyń 7 qyzmetkeri sybaılas jemqorlyqty júıeli túrde jasaǵan.

Olar júk tasymaldaýshylardan kólikti baqylaý pýnktinen kedergisiz ótý jáne óńir aýmaǵynda erkin júrip-turý múmkindigi úshin 10 myńnan 300 myń teńgege deıin para alyp keldi.

«Sonymen qatar tekserý barysynda kólikti baqylaý ınspektorlary tekserý is-sharalaryn ótkizý kezinde beınetirkeý tártibin saqtamaǵany belgili boldy. Atap aıtqanda, ınspektorlar tek kólikti toqtatý jáne qajetti qujattardy talap etý barysyn ǵana tirkep otyrǵan. Baqylaý protsedýrasynyń ózine beınejazba júrgizilmegen. Al qolda bar 289 beınematerıalda kún men ýaqyt boıynsha sáıkessizdikter anyqtaldy», - delingen aqparatta.

ShQO-da sońǵy úsh jylda 65 polıtseı jemqorlyqpen ustalǵanyn osyǵan deıin habarlaǵan edik.