ShQO-da qoǵamdyq orynda maska taqpaǵandarǵa aıyppul salynýda
Óńirde arnaıy qurylǵan monıtorıngilik toptar karantın talaptarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıd júrgizýde.
«19 sáýir kúni Óskemende 290 obektige tekserý júrgizildi. Sonyń nátıjesinde karantın talabyn buzýdyń 8 faktisi anyqtaldy. Sondaı-aq buryn tirkelgen zańbuzýshylyqtar boıynsha 175 020 teńge mólsherinde aıyppul óndirildi», - delingen ShQO Aqparat ortalyǵy taratqan málimette.
Semeı qalasynda 352 nysan tekserilip, qoǵamdyq kólikterde, saýda oryndarynda maska rejımin buzǵan 15 adam tirkeldi. 131 265 teńge somasyna 3 hattama toltyrylyp, 131 265 teńge kóleminde 3 aıyppul óndirildi.
Budan bólek, monıtorıngilik toptar Rıdder, Kýrchatov qalalary men Altaı, Aıagóz, Úrjar, Ulan, Abaı, Zaısan, Glýbokoe, Besqaraǵaı jáne Kúrshim aýdandarynda reıd júrgizdi. Tekserý barysynda eshqandaı buzýshylyq tirkelmedi.