ShQO-da kemeni paıdalaný erejesin buzǵan birneshe adamǵa aıyppul salyndy

ÓSKEMEN. QazAqparat – Shyǵys Qazaqstan oblysynyń qutqarýshylary jaz bastalǵaly jaǵajaılarǵa 1700-den astam reıd júrgizdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda 22 ýchaskede shomylýǵa ruqsat etilgen. Al, oblystyq máslıhattyń sheshimimen shomylýǵa tyıym salynǵan 74 oryn jáne shaǵyn kólemdi kemelerge júzýge ruqsat etilmegen 29 ýchaske bar. Búgingi tańda osy aýmaqtarǵa 201 tyıym salý jáne eskertý belgisi, 12 banner ornatylǵan.

Shomylý maýsymy bastalǵaly beri qutqarýshylar sý aıdyndarynyń jaǵalaýlaryna 1 738 reıd júrgizdi. Sondaı-aq, 154 ret halyqpen jıyn jáne 10 myńnan astam demalýshy qamtylǵan 18 aktsııa ótkizdi.

«Osy sharalarǵa qaramastan, halyq sýdaǵy qaýipsizdik erejelerin buzýdy toqtatpady. Jyl basynan beri jalpy sý paıdalaný qaǵıdalaryn buzǵany úshin 9 adamǵa eskertý jasaldy, jaǵalaýda alkogoldi ishimdikterdi ishkeni nemese qoǵamdyq orynda mas kúıde júrgeni úshin QR ÁQBtK-niń 440-baby boıynsha 24 adam jaýapqa tartylǵan. Kemelerdi paıdalaný erejesin saqtamaǵan 5 azamatqa QR ÁQBtK 582-babyna sáıkes aıyppul salyndy», - delingen aqparatta.

Aıta keteıik, jaz shyqqaly beri Shyǵys Qazaqstanda 3 adam sýǵa batyp ketti. Onyń bireýi - bala.