ShQO-da qatty jel 3 adam otyrǵan qaıyqty aýdaryp jiberdi

ÓSKEMEN. QazAqparat – Shyǵys Qazaqstan oblysy Kókpekti aýdany Sarybel aýylyndaǵy Buqtyrma sý qoımasynda qatty jelden 3 adam otyrǵan qaıyq aýdarylyp ketti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 10 tamyzda saǵat 16.00-de Buqtyrma sý qoımasynda 3 adam rezeńke qaıyqpen júrgen. Kenet qatty jel soǵyp ketti. Sol kezde jeldiń qaıyqty tóńkerip túsirý múmkindigin sezgen demalys ornynyń ákimshisi dereý ýchaskelik ınspektorǵa habarlasqan.

Osy kezde úsh azamat óz betterimen jaǵaǵa jetýge tyrysyp jatty. Alaıda ekpindi jelden qaıyq aýdarylyp túsken.

«Oqıǵa ornyna kelgen Samar polıtsııa bóliminiń ýchaskelik ınspektory, leıtenant Tilek Eltaev birden sýǵa sekirdi. Qaıyq aýdarylǵan jerge jetken ol qaıyqty ustap alyp, oǵan azamattarǵa qaıta kóterilýge kómektesti. Osylaısha, barlyǵy aman-esen jaǵaǵa jetti», - delingen habarlamada.