ShQO-da qandastarǵa arnalǵan arnaıy saıt jasaldy
Shyǵys Qazaqstan oblysyndaǵy «EMIR» qoǵamdyq qory 2004 jyly qurylǵan. Qordyń maqsaty – qorshaǵan ortany qorǵaý salasyndaǵy jumys, ekologııalyq bastamalardy ilgeriletý jáne ekologııa salasyndaǵy memlekettik mekemelerdiń qyzmetine taldaý jasaý.
«2021 jyly qor komandasy jańartylyp, jańa jobalar qolǵa alyndy. Sol jyly «Qazaqstandaǵy repatrıatsııa: problemalar men sheshimder» granttyq jobasy júzege asyryldy. Osy joba aıasynda elimizge oralǵan qandastardyń qazirgi jaǵdaıyna zertteý júrgizilip, postkeńestik jáne eýropalyq memleketterdiń repatrıatsııa saıasaty salystyryldy. Sondaı-aq Kandas.kz aqparattyq saıty ázirlendi. Onda qandastarǵa Qazaqstanǵa kelgen kezde qajetti eń negizgi (óńirlerdegi ahýal, turǵyn úı quny, ortasha jalaqy, mektepter, medıtsınalyq mekemeler týraly) málimetter boldy», - delingen qor ókilderi taratqan aqparatta.
2022 jyly qor úsh jobany júzege asyrýda. Onyń biri – Óskemen qalasynyń turǵyndaryna arnalǵan «Taza qala» ınternet-platformasyn damytý. Bul jobanyń maqsaty – shahar turǵyndary shaǵym túsire alatyn resýrs jasaý. Sol arqyly qala aýmaǵyndaǵy shashylǵan qoqys úıindileri, qoqysty ýaqtyly shyǵarmaý máseleleri boıynsha memlekettik organdarǵa shaǵym túsirýge bolady. Sonymen qatar resýrsta tabıǵat qorǵaý is-sharalaryn uıymdastyrý aıdary da jasalǵan. Bul jergilikti tabıǵat qorǵaý belsendilerin biriktirýge múmkindik beredi.
«Óskemen qalasynyń turmystyq qatty qaldyqtardy shyǵarý júıesin jańǵyrtýdaǵy turǵyndardy alańdatatyn jaıttar» atty joba qolǵa alynǵan. Joba sheńberinde azamattardyń usynystary eskerilip, túrli qoǵamdyq pikirlerge taldaý jasalady. Bul pikirler bılik tarapynan jańa qatty turmystyq qaldyqtar polıgony salynǵan kezde mindetti túrde eskeriletin bolady.
«Úshinshi joba «Qazaqstan Respýblıkasynyń Parlamentarızmdi damytý» qorynyń qoldaýymen júzege asyrylýda. Ol jobanyń maqsaty – qala mańyndaǵy saıajaılarda turý úshin jaǵdaı jasaý jáne azamattardyń tıisti baspanaǵa quqyqtaryn qamtamasyz etý baǵytynda jergilikti atqarýshy organdardyń qyzmetine táýelsiz taldaý jasaý. Buqaralyq aqparat quraldarynyń materıaldaryn, azamattardyń ótinishterin jáne memlekettik organdardyń jaýaptaryn taldaý arqyly saıajaılarda turatyn azamattardyń máseleleri óte ózekti ekenin jáne quzyrly mekemelerdiń osy turǵyndarmen egjeı-tegjeıli jumys isteýi qajettigin kórsetti. Óıtkeni kóp jyldar boıy sheshilmegen ınfraqurylymdyq máseleler, turǵyndardyń quqyqtaryn qorǵaıtyn zańnamalyq bazanyń joqtyǵy áleýmettik shıelenis faktoryna aınalýy múmkin», - delingen habarlamada.