ShQO-da qala balalary aýylda bir otbasynyń úıinde 20 kún turyp, qazaq tilin úırenedi
ShQO bilim basqarmasynyń málimetine súıensek, bıyl óńirde memlekettik tildi oqytý maqsatynda alǵash ret «Qonaqjaı otbasy» pılottyq jobasy qolǵa alyndy.
Sonyń aıasynda balalar qazaq tilin erekshe, biraq óte tıimdi formatta úırenedi.
«Balalar aýylǵa baryp, tildik ortaǵa enedi. Ol úshin Katonqaraǵaı aýdanyndaǵy Katonqaraǵaı, Órel jáne Berel aýyldary tańdap alyndy. Sonymen qatar oqýshylarǵa ólkeniń tarıhyn, qazaq halqynyń salt-dástúrlerin bilýge, halyq aspaptarynda oınaýǵa, jergilikti kórikti jerler men tarıhı eskertkishterge barýǵa múmkindik beretin baǵdarlama daıyndaldy. Qaýipsizdikti qamtamasyz etýdiń barlyq sharalary oılastyrylǵan», - delingen aqparatta.
Jobada belgili bir tildik bilimi men sózdik qory bar 12-den 14 jasqa deıingi balalar qatysady. Árbir bala úshin qabyldaýshy otbasyna 180 myń teńgeden tólenedi.
«Aýdan ákimdigi 20 mamyrdan 1 shildege deıin jumys isteıtin arnaıy shtab qurady. Jobaǵa osy aýyldarda turatyn pedkolledjder men joǵary oqý oryndarynyń stýdentteri qatarynan eriktiler tartylmaq. Barlyq bala qonaq otbasylaryna 10-30 maýsym aralyǵynda bir ýaqytta barady», - delingen habarlamada.
Búginde jobaǵa qatysýǵa 25 bala ótinim bergen.
Onyń ishinde Óskemende - 12, Rıdder qalasynda - 3, Shemonaıha aýdanynda - 3, Glýbokoe aýdanynda - 4, Altaı aýdanynda - 3 bala.
Balalardy qabyldaıtyn ár otbasy sáýir aıynyń sońyna deıin muqııat tekserýden ótedi.
12 mamyrǵa deıin bilim bólimi, balalardyń ata-analary jáne qabyldaýshy otbasylar arasynda úsh jaqty sharttar jasalmaq.