ShQO-da iri qara malynyń qyrylýyna baılanysty arnaıy komıssııa jumysyn bastady

ÓSKEMEN. QazAqparat - ShQO Kóktal aýyldyq okrýginde úı janýarlarynyń ólýine baılanysty arnaıy veterınarlyq komıssııa jumysqa kiristi, dep habarlaıdy QazAqparat Aýyl sharýashylyǵy mınıstrligine silteme jasap.

Maldyń ólim-jitimin anyqtaý úshin 20 sáýirde Úrjar aýdanyna quramynda ShQO aýmaqtyq veterınarııalyq ınspektsııasy men ShQO ákimdiginiń veterınarııa basqarmasynyń basshylary bar arnaıy komıssııa keldi. Osy ýaqytqa deıin (17 jáne 20 sáýir) synama alynyp, Úrjar aýdandyq veterınarııalyq zerthanasyna jáne «Respýblıkalyq veterınarııalyq zerthana» RMK Semeı óńirlik fılıalyna jiberildi. Aldyn ala pretsıpıtatsııalyq reaktsııa (RP), mıkroskopııa jáne bakterıologııalyq teris nátıje alyndy.

Zertteýler jalǵasýda, úsh kúnnen keıin bıo-synamanyń qorytyndysy aıaqtalady, bul dıagnoz qoıýǵa múmkindik beredi. Qazir komıssııa aımaqtaǵy epızootııalyq jaǵdaıdy baqylaýda ustap otyr.

Aıta ketsek, ázirge belgisiz sebeptermen mal qyrylǵan Kóktal aýyldyq okrýgi Úrjar aýdanynyń taýly aımaǵynda ornalasqan.

Aýyldyq okrýgte 3 myńǵa jýyq iri qara, 3,6 myń usaq mal jáne 629 jylqy bar. Veterınarııalyq is-sharalar josparyna sáıkes 2019 jyldyń kúzinde jáne 2020 jyldyń basynda okrýgte maldardyń basym bóligi qaýipti aýrýlarǵa qarsy egilgen. Atap aıtqanda, aýsylǵa qarsy 3 235 bas iri qara jáne 2 myń usaq mal, sibir jarasyna qarsy 2 myńnan astam iri qara jáne 650 bas usaq mal, emkarǵa qarsy 1,3 myń bas iri qara malǵa ekpe salyndy.

Esterińizge salsaq, osy aptada BAQ betterinde Shyǵys Qazaqstan oblysyndaǵy belgisiz aýrýdan iri qara maly qylyp jatyr degen habar taraǵan bolatyn.