ShQO-da ınvestorlar esebinen 82 kópqabatty úı salynyp jatyr

ÓSKEMEN. QazAqparat – Shyǵys Qazaqstan oblysynda jeke ınvestıtsııalar tartý arqyly 82 kópqabatty úı salynyp jatyr, dep habarlaıdy QazAqparat tilshisi.

ShQO ákimdiginiń málimetine súıensek, ótken jyly óńirde 602,8 myń sharshy metr úı paıdalanýǵa berilgen. Al Óskemende bir jyl ishinde 205,1 myń sharshy metr baspana salyndy. Qazirde oblys boıynsha 1 mln sharshy metrge jýyq turǵyn úı salynyp jatyr.

«Byltyr 565 kópbalaly otbasy qonys toıyn toılady. 2017-2021 jyldary aralyǵynda kópbalaly januıalardyń baspanaǵa muqtajdyǵy bes esege artty. Jeke turǵyn úı qurylysyn arttyrý úshin «Birqabatty Shyǵys» óńirlik baǵdarlamasy júzege asyrylyp jatyr. Óskemende memleket qarjysy esebinen jeti turǵyn aýdanǵa ınjenerlik kommýnıkatsııalar tartyldy», - dedi aımaq basshysy Danıal Ahmetov.

Sondaı-aq Shyǵys Qazaqstanda jeke ınvestıtsııa tartý arqyly jalpy aýmaǵy 479 myń sharshy metr 82 kópqabatty kommertsııalyq úı salynyp jatyr.

Osyǵan deıin ShQO-da úshinshi maı óńdeý zaýyty ashylǵanyn jazdyq.