ShQO-da halqy múlde araq ishpeıtin 4 aýyl bar
Qylmystardyń basym bóligi mas kúıde jasalatyny belgili. Sondyqtan alkogoldi ishimdikterge áýes adamdarmen tıisti jumys júrgizýdiń mańyzy zor. Bul ákimshilik quqyq buzýshylyqtardyń, túrli qylmystardyń aldyn alady.
Ótken jyly Shyǵys Qazaqstandaǵy ýaqytsha beıimdeý jáne detoksıkatsııa ortalyǵyna barlyǵy 5000-nan astam adam ornalastyrylǵan. Sondaı-aq alkogolge táýeldi 370-ke jýyq adam emdeýge jiberildi.
«Ońaltý kýrsynan ótkennen keıin olardy ýchaskelik ınspektorlar turaqty túrde tekseredi, qylmyskerlerdiń arbaýyna túsip qalmaýyn jáne ózderi zańbuzýshylyq jasamaýyn qadaǵalaıdy. Sonymen qatar polıtseıler zańsyz alkogol saýdasyna tosqaýyl qoıý jumystaryn qolǵa alǵan. Bir jyl ishinde oblysta 16,5 tonna spırt ónimi tárkilengen, 205 adam ony zańsyz satqany úshin ákimshilik jaýapkershilikke tartylǵan», - delingen ShQO Polıtsııa departamentiniń baspasóz qyzmeti taratqan aqparatta.
Aıta keteıik, búginde óńir boıynsha tórt aýyl turǵyndary araqty tatyp almaıdy. Olar: Katonqaraǵaı aýdanyndaǵy Kókbastaý, Kúrshim aýdanyndaǵy Terektibulaq, Ulan aýdanynyń Januzaq jáne Tarbaǵataı aýdanynyń Baıtoǵas aýyldary. Halqy ishimdik ishýden bas tartqan bul aýyldarda birde-bir quqyq buzýshylyq tirkelmegen. Bul basqa eldi mekenderdiń halqyna úlgi.