ShQO-da halyqaralyq «Shyǵys salburyny» búrkitshiler festıvali ótedi

<p>ÓSKEMEN. KAZINFORM &ndash; Qazan aıynyń 10-14 aralyǵynda Shyǵys Qazaqstan oblysy Ulan aýdanynyń Bozanbaı aýylynda ornalasqan Búrkit tóbe alańynda dástúrli halyqaralyq &laquo;Shyǵys Salburyny&raquo; búrkitshiler festıvali ótedi. Bul týraly ShQO ákiminiń orynbasary Erbol Nurǵalıev óńirlik kommýnıkatsııalar qyzmetinde ótken brıfıng kezinde málimdedi.&nbsp;</p>

«Shyǵys salburyny» qazaq halqynyń baı mádenı murasyn jandandyryp, ulttyq sport pen qundylyqtardy dáripteý arqyly salamatty ómir saltyn nasıhattaýǵa arnalǵan. Festıval Shyǵys Qazaqstan oblysynyń ákimi Ermek Kósherbaevtyń jáne «Respýblıkalyq Qusbegilik federatsııasy» qoǵamdyq birlestiginiń qoldaýymen uıymdastyrylady. 

«Sharanyń basty maqsaty – ulttyq sport arqyly jastardy otansúıgishtikke tárbıelep, salamatty ómir saltyn ustanýdy qoldaý, ulttyq qusbegilik sportyn, tazy júgirtý, asaý úıretý ónerin keńinen taratý. Bıyl Qazaqstan men shet memleketterden 5 myńǵa jýyq týrıst keledi dep josparlanýda, - dedi ShQO ákiminiń orynbasary Erbol Nurǵalıev. 

Atap aıtqanda, Mońǵolııa, Qytaı, Qyrǵyzstan, Reseı jáne Majarstannan qatysýshylar shaqyrylyp otyr. Barlyǵy 80 búrkit, 30 suńqar jáne 30 tazy jarysqa túsedi dep kútilýde. 

Festıval aıasynda eki kún boıy búrkitshilerdiń qustardy jemge, erkin jáne ıesiniń shaqyrýymen ushyrý saıystary, shyrǵamen qoıan jáne túlki aýlaý jarystary ótedi. Sonymen qatar jamby atý, teńge ilý, tazy ıtteriniń jarysy jáne jabaıy jylqylardy úıretý syndy ulttyq sporttyq jarystary uıymdastyrylady. 

20-dan astam kıiz úıde qazaq halqynyń dástúrli kórmeleri qoıylyp, qonaqtar syrmaq jasaý, keste tigý, ulttyq taǵam daıyndaý boıynsha sheberlik sabaqtaryna qatysa alady. Atqa miný, sadaq atý, baǵaly syılyqtarmen lotereıa jáne ystyq tamaq ta festıval baǵdarlamasyna eńgizilgen.

Іs-sharanyń basty aqparattyq seriktesteri: Jibek Joly telearnasy, Qazsport sport arnasy jáne Zhetysu TV telearnasy.