ShQO-da fermerdiń 70 tonnadan astam shóbi janyp ketti

ÓSKEMEN. QazAqparat – Shyǵys Qazaqstan oblysyndaǵy Altaı aýdanynda 70 tonnadan astam pishen janyp ketti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, órt keshe keshki ýaqytta Altaı aýdanyndaǵy sharýa qojalyǵynyń aýmaǵynda shyqqan. Tilsiz jaý 73 tonna pishendi sharpyǵan.

«Órt sóndirýshiler oqıǵa ornyna shuǵyl kelip jetti. Kóp uzamaı tolyqtaı aýyzdyqtalǵan órttiń sharýashylyq qora-jaılarǵa taralýyna jol berilmedi. Qyzyl jalynnyń shyǵýyna ne sebep bolǵany ázirge belgisiz», - dep habarlady vedomstvo ókilderi.

Aıta keteıik, órtti óshirýge jeke quramnan 12 adam, 4 tehnıka men sharýa qojalyǵynyń júk tıegishi jumyldyrylǵan.