ShQO-da «Evro 5» markasymen arzan benzın satylǵan

ÓSKEMEN. QazAqparat – Shyǵys Qazaqstan oblysynda janarmaı baǵasyn zańsyz qymbattatý deregi tirkeldi, dep habarlaıdy QazAqparat tilshisi.

Básekelestikti qorǵaý jáne damytý agenttigi ShQO boıynsha departamentiniń málimetine súıensek, óńirdegi kompanııalardyń biri janarmaı baǵasyn zańsyz qymbattatqan.

Anyqtalǵandaı, «Shtıf» janar-jaǵarmaı quıý stansasy jelisinde janarmaı satýmen aınalysatyn «Vostok-Logıstıks» JShS AI-92 markaly benzınniń eki túrin saýdalaǵan. Pavlodar munaı-hımııa zaýyty shyǵarǵan janar-jaǵarmaıdyń lıtri 180 teńgeden satylsa, Atyraý munaı óńdeý zaýytynan shyqqan janar-jaǵarmaıǵa «AI-92 Evro 5 ANPZ» markasy jazylyp, lıtri 182 teńgeden satylǵan.

«Janarmaı quıý stantsııasynyń operatorlary tutynýshylardyń qoıǵan suraqtaryna «benzın baǵasynyń ártúrli bolýy «AI-92 Evro 5 ANPZ» markaly benzın sapasynyń jaqsyraqtyǵy sebep» dep túsindirgen. Alaıda Qazaqstanda «Eýro 5» benzıni uǵymy 180 teńge kóleminde satylatyn janarmaıda múlde qoldanylmaıdy. Sondyqtan benzınge osyndaı markany jazyp kórsetý – tutynýshylardy jańylystyrdy», - delingen aqparatta.

Departament qyzmetkerleriniń talabynan keıin qazir «Vostok-Logıstıks» JShS zańsyzdyqty joıdy. Baǵa 180 teńgege túsirildi.