ShQO-da esirtkini «jasyryp ketýshiden» marıhýananyń iri partııasy tárkilendi

ÓSKEMEN. QazAqparat – Óskemen qalasynyń polıtsııa qyzmetkerleri esirtkini «jasyryp ketýshini» ustady, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, esirtki qylmysyna qarsy kúres basqarmasynyń qyzmetkerleri 42 jastaǵy óskemendikti ustady. Esirtki taratýmen aınalysqan ol ýaqytsha ustaý ızolıatoryna qamaýǵa alyndy.

Ustalǵan adamnyń úıin tintý kezinde garajda plastıkalyq konteıner, satýǵa daıyn turǵan belgili bir ıisi bar qońyr-jasyl tústi ósimdik salynǵan eki polımerli paket tabyldy.

«Saraptama qorytyndysyna sáıkes, tabylǵan zattar jalpy salmaǵy 1 keli bolatyn keptirilgen marıhýana ekenin kórsetti. Sondaı-aq onyń kóligin tintý kezinde taǵy marıhýana salynǵan 4 polımerlik túıinshek tárkilendi. Er adamnyń ony odan ári satý maqsatynda saqtaǵany belgili boldy», - dedi esirtki qylmysyna qarsy kúres basqarmasynyń bastyǵy Narıman Kúldikov.

Qazirgi ýaqytta atalǵan fakti boıynsha QR QK-niń 297-baby 2-bóligine sáıkes (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) sotqa deıingi tergeý júrgizilýde.