ShQO-da «erekshe» tender jarııalap, óz merdigerine kóńili burǵan veterınarlar tergelip jatyr
Áleýmettik jelide Samar aýdanyndaǵy vetstansanyń yqtımal merdigermen aldyn ala sóz baılasyp, tenderdi soǵan bermek bolǵany jaıly aqparat tarady.
Onda memlekettik satyp alýdaǵy habarlandyrýdyń ishinde «erekshe mátin» júrgeni jazylǵan.
«9 kólik úshin saqtandyrý quny — 201 546 teńge. Tehnıkalyq sıpattamasy ÝAZ 390945-330, LADA GRANTA SSANG YONG ACNOYON SPORT LADA 21214 LADA 21214 LADA 21214 LADA 21214 LADA 21214 LADA 21214. Boldy, kólikter týraly basqa eshteńe qospańdar: memlekettik nómirdi de, shanaq nómirin de, tirkeý nómirin de. Áıtpese, basqa saqtandyrýshylar kórip, Petropavldyń bir jerinen shyǵa keledi. Eger olar qońyraý shalyp, kólikter nemese basqa nárse týraly suraq qoısa, onda satyp alýmen aınalysatyn maman ornynda joq dep jaýap bere salýǵa bolady. Konkýrsqa shyǵar aldynda maǵan qońyraý shalyńdar. Shyǵar aldynda eki kún buryn bolsa jaqsy. Men óz adamdaryma eskertip qoıý úshin. Eger bárin men jazǵandaı istesek, oılaǵanymyz iske asady», — dep jazylǵan mátinde.
Osyǵan baılanysty ShQO aýyl sharýashylyǵy basqarmasy resmı málimdeme taratty.
«Samar-Vet» kommýnaldyq kásipornynyń memlekettik satyp alýǵa shyǵarǵan habarlandyrýy monıtorıng kezinde anyqtalyp, birden alynyp tastaldy. Qyzmettik tekserý bastalyp, materıaldar quzyrly organdarǵa jiberildi. Tekserý qorytyndysy boıynsha kináli laýazymdy tulǵalar zańǵa sáıkes qatań jaýapkershilikke tartylady. Sondaı-aq aýdandaǵy vedomstvolyq baǵynysty uıymdardyń basshylary men mamandary sybaılas jemqorlyq táýekelderine qatysty ishki aýdıtten ótedi», — deıdi basqarma basshysynyń orynbasary Ramıl Saǵandyqov.