ShQO-da ekologııa talaptaryn buzǵan kásiporyndarǵa 26 mlrd teńge aıyppul salyndy

ÓSKEMEN. QazAqparat – Shyǵys Qazaqstan oblysynda bir jylda ekologııalyq talaptardy buzǵan kásiporyndarǵa 26 mlrd teńgege jýyq aıyppul salynǵan, dep habarlaıdy QazAqparat tilshisi.

ShQO ekologııa departamentiniń málimetine súıensek, byltyr óńirdegi túrli kásiporyndar men zaýyttarǵa 86 ret tekserý jasaldy.

Onyń ishinde 19-y baqylaý kestesi boıynsha bolsa, 67-si jospardan tys júrgizilgen.

«Sonyń nátıjesinde, ekologııalyq talaptardy buzýdyń 167 faktisi anyqtalyp, zańbuzýshylyqtardy joıý týraly 56 uıǵarym shyǵaryldy. Jalpy somasy 26 mlrd teńgege jýyq 177 aıyppul salynǵan. Búginde 436 mln teńgeniń 158 aıyppuly óndirildi. Al qalǵan 15 aıyppul boıynsha erikti tóleý merzimi áli ótpegen. Tekserýler barysynda birinshi kezekte qoǵamnyń narazylyǵyn týdyrǵan quqyq buzýshylyqtardyń mán-jaıy men sebepterin anyqtaýǵa nazar aýdarylýda», - delingen aqparatta.

Sondaı-aq jalpy somasy 1 020 950 teńge bolatyn 4 aıyppul boıynsha is májbúrlep óndirip alý úshin tıisti organdarǵa joldanǵan.