ShQO-da eki qarjy pıramıdasyna kirgen 250 adam 400 mln teńge shyǵynǵa batty
ShQO Ekonomıkalyq tergeý departamenti jyl basynan beri 4 qarjy pıramıdasyn anyqtap, zańsyz áreketterine tosqaýyl qoıdy. Eki aıaqtalǵan is boıynsha aldanǵan adamdardyń sany 250-ge jetken. Halyqqa barlyǵy 400 mln teńge shyǵyn keltirildi. Bul týraly departament basshysy Aıdyn Moldabekov málim etti.
- «Chia Tai-Tianqing Pharmaceutical» jáne «Eolus» sııaqty kompanııalar farmatsevtıka men jańartylatyn energetıka salalaryna aqsha quıýǵa shaqyrǵan. Osylaısha, halyqtyń áleýmettik osal toptaryn mol tabys tabýǵa bolatynyn aıtyp aldady. Qarjy pıramıdalarynyń negizgi belgileri kelesideı: adam tartý arqyly tólem alý, ınternette belsendi jarnama júrgizý, kompanııanyń Qazaqstanda tirkelmeýi nemese jaqynda tirkelýi, aqshany beıresmı tólem júıeleri arqyly qabyldaý, - deıdi ol.
Kúmándi kompanııalardy tekserý úshin «Baiqa, piramida!» telegram-boty jasalǵan. Onda kompanııanyń BIN-in nemese saıtynyń siltemesin engizip, táýekelder týraly aqparat alýǵa bolady.
Eske salsaq, osyǵan deıin Mańǵystaý oblysynda «Sax Invest» qarjy pıramıdasy bólimshesiniń basshysy ustalǵany habarlanǵan.