ShQO-da dala órtin aýyzdyqtaýǵa 100 adam men MI-8 tikushaǵy tartyldy

ÓSKEMEN. QazAqparat – Shyǵys Qazaqstan oblysynda órt sóndirýshiler 2 gektar aýmaqqa jaıylǵan tilsiz jaýmen kúresýde, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, búgin «101» qyzmetine habarlasqan Leshoz kentiniń turǵyndary Rıdder orman sharýashylyǵynda shóp janyp jatqany týraly aıtqan. Oqıǵa ornyna órt sóndirýshiler jedel kelip jetti.

«Qyzyl jalyndy aýyzdyqtaýǵa barlyǵy 6 tehnıka men jeke quramnan 100-den astam adam jumyldyrylǵan. Aldyn ala málimet boıynsha órttiń shyǵýyna otty abaısyz paıdalaný sebep bolǵan.

Qazirgi ýaqytta órtti sóndirýge arnalǵan desanty jáne sýaǵar qurylǵysy bar MI-8 tikushaǵy ushýǵa daıyndalýda», - dep habarlady vedomstvo ókilderi.

Osy rette, departament mamandary ormandy jerde órt qaýipsizdigi erejelerin qatań saqtaý qajettigin eske salady.