ShQO-da dál búgin 100-ge tolǵan soǵys ardageri daýys berdi

ÓSKEMEN. QazAqparat – Shyǵys Qazaqstan oblysynda dál búgin 100-ge tolǵan soǵys ardageri daýys berdi, dep habarlaıdy QazAqparat tilshisi.

Anastasııa Svetocheva 20 qarasha kúni júz jasqa tolyp otyr. Mereıtoıynda ol konstıtýttsııalyq quqyǵyn paıdalanyp saılaýda daýys berdi.

Soǵys ardageri úıde otyryp óz daýysyn berdi. Keıýana áli kúnge deıin tyń, jigerin joǵaltpaǵan.

«Saılaý bárimiz úshin mańyzdy. Qazaqstan – bizdiń ortaq úıimiz. Eldiń bolashaǵy úshin árqaısymyz jaýaptymyz. Memleketimizdiń qandaı jetistikterge jetip jatqanyn kórip otyrmyz. Biraq bul bastamasy ǵana dep senemin», - deıdi Anastasııa Pavlovna.

Anastasııa Svetocheva I dárejeli «Otan soǵysy» ordeniniń ıegeri. 1942 jyly mamyrda ony Oktıabr áskerı komıteti Keńes Armııasynyń qataryna qosty.

Lenıngrad qalasyndaǵy 26-shy jeke Qyzyl Tý baılanys polkinde qyzmet etken.

Ol Lenıngradty qorǵaý jáne qorshaýdy buzý shaıqasyna qatysty. Soǵystan keıin týǵan jeri Shyǵys Qazaqstanǵa oralyp, ómir boıy eńbek etti.