ShQO-da brýtsellez juqtyrǵan adam sany artty
Oblystyq veterınarııa basqarmasynyń málimetine súıensek, óńir boıynsha sońǵy tórt jylda mal arasynda brýtsellez juqtyrý kórsetkishi 3 ese azaıǵan. Naqty aıtqanda, 2020 jyly 3478 bolsa, 2024 jyly - 1120.
Alaıda brýtsellezge shaldyqqan adam sany kóbeıdi. Byltyr halyq arasynda 36 jaǵdaı tirkelse, onyń aldyńǵy jyldary aýrý juqtyrǵandar sany saýsaqpen sanarlyqtaı edi. Naýqastar arasynda Marqakól, Zaısan, Tarbaǵataı, Kúrshim, Úlken Naryn, Glýbokoe, Ulan aýdandary men Óskemen qalasynyń turǵyndary bar.
- Aýrýdyń aldyn alý úshin jappaı ekpe saldyrtyp jatyrmyz. Bul mal basyn 80 paıyzǵa deıin qorǵaýǵa múmkindik beredi. Dese de adamdardyń brýtsellezge shaldyǵýy máselesi áli de ózekti, - deıdi basqarma basshysy Ramıl Saǵandyqov.
Adamdar arasynda aýyrǵandar sanynyń artýyna sapasyz óńdelgen et pen sútti tutyný sebep bolýy múmkin. Sondyqtan óńir jurtshylyǵyna mal ónimderinen tamaq daıyndaǵanda muqııat bolý qajettigi eskertildi. Uzaq termııalyq óńdeńdelgen ónimderde ǵana brýtsellez bakterııalary joıylady.
Eske salsaq, osyǵan deıin brýtsellezden keler qaýip-qaterdiń qandaı ekendigin jazǵanbyz.