ShQO-da boranda adasyp, úsip qalǵan adamnyń qazirgi jaǵdaıy qalaı

<p>ÓSKEMEN. KAZINFORM — Shyǵys Qazaqstan oblysynda tótenshe jaǵdaı jarııalanǵan Kúrshim aýdanynda boranda adasyp, denesin úsik shalǵan er adam aýrýhanada jansaqtaý bóliminde jatyr.</p>

Maraldy aýyldyq okrýginde atpen kele jatyp, qarly boranda adasyp qalǵan eki adamnyń biri kóz jumyp, ekinshisiniń aıaǵy úsip ketkeni habarlanǵan.  

Sol azamattyń jaǵdaıyn bilý úshin ShQO Densaýlyq saqtaý basqarmasyna habarlasqan edik.

«Keshe ol sanıtarlyq avıatsııamen Óskemenge jetkizildi. Avıatsııa brıgadasynyń quramynda reanımatolog Aleksandr Patrın men feldsher Larısa Velıchko bolǵan. Naýqas oblystyq mamandandyrylǵan medıtsınalyq ortalyqtyń jansaqtaý jáne ıntensıvti terapııa bólimshesine jatqyzyldy. Jaǵdaıy birqalypty. Denesiniń birneshe bóligin úsik shalǵan. Dárigerler oǵan tıisti kómek kórsetip jatyr», — deıdi basqarmanyń baspasóz hatshysy Ásem Qaıratbek.