ShQO-da bıyl múmkindigi shekteýli jandardyń quqyǵy 50 ret buzyldy

ÓSKEMEN. QazAqparat – Shyǵys Qazaqstan oblysynda jyl basynan beri múmkindigi shekteýli jandardyń quqyǵy 50 ret buzyldy, dep habarlaıdy QazAqparat tilshisi.

Eńbek, áleýmettik qorǵaý jáne kóshi-qon komıteti ShQO departamentiniń málimetine súıensek, 2022 jyldyń alǵashqy úsh aıynda arnaýly áleýmettik qyzmet kórsetý jáne múgedekterdi áleýmettik qorǵaý salasyna qatysty 14 tekserý júrgizildi. Sondaı-aq múmkindigi shekteýli jandardyń aryz-shaǵymdary boıynsha jospardan tys 5 tekserý jasaldy.

«Sonyń nátıjesinde, 50 quqyq buzýshylyq anyqtaldy. Óńirde múgedek azamattar áleýmettik nysandarynyń barlyǵyna pandýstyń joqtyǵynan áli kúnge deıin emin-erkin kire almaıdy. Osyndaı 35 buzýshylyq tirkeldi. 15 jaǵdaıda múgedekterdiń arnaýly áleýmettik qyzmetterdi alý quqyqtary buzylǵan», - deıdi departamenttiń halyqty áleýmettik qorǵaý salasyndaǵy baqylaý bóliminiń basshysy Maqsat Chýkýbaev.

Onyń aıtýynsha, josparly túrde Semeı qalasynyń №3 arnaýly áleýmettik qyzmet kórsetý ortalyǵy, Altaı qalasyndaǵy qarttar úıi, Jarma aýdanynyń áleýmettik qyzmet kórsetý ortalyǵy, bes mektep jáne Shar qalasy ákiminiń apparaty tekserildi.

Esterińizge sala ketsek, osyǵan deıin 126 myńnan astam múgedektigi bar qazaqstandyqtyń onlaın qyzmet alǵany habarlanǵan.