ShQO-da bıyl ınternet alaıaqtyqtyń 300-ge jýyq faktisi tirkeldi
Óńir boıynsha bıyl ınternet arqyly jasalǵan alaıaqtyqtyń 300-ge jýyq faktisi tirkeldi. Onyń 80%-y oblys jáne respýblıka aýmaǵynan tys jerden jasalǵan. Bul týraly baspasóz máslıhaty barysynda Óskemen qalasy polıtsııa basqarmasy krımınaldyq polıtsııa bólimshesi bastyǵynyń orynbasary Azamat Rahadylov málim etti.
«Qazirgi ýaqytta ınternet alaıaqtyq – qylmystyń eń kóp taraǵan túrine jatady. Alaıaqtar halyqty OLH, Kolesa, Krysha saıttarynda jáne áleýmettik jelilerde kezdesetin taýarǵa nemese qyzmetke aldyn ala tólem jasaýdy suraý arqyly aldaıdy. Sonymen qatar bank qyzmetkerleri atynan qońyraý shalyp, jábirlenýshiniń shottaryna kúmándi operatsııalar júrgizilip jatqandyǵy týraly sendirip, onyń atyna nesıe rásimdeıdi nemese shotta bar aqshany tolyǵymen sheship alady. Azamattarǵa qońyraý shalyp ózderin quqyq qorǵaý organdarynyń qyzmetkerleri dep tanystyra otyryp, tanysy nemese jaqyn týysy qıyn jaǵdaıǵa tap bolǵanyn jáne oǵan kómektesý úshin belgili bir mólsherde aqsha qajet ekenin aıtý arqyly da alaıaqtyq jasalǵan faktiler jeterlik», - deıdi ol.
Alaıaqtyń qurbany bolmaý úshin birneshe qarapaıym qaǵıdany este saqtaý qajet.
«Bank qyzmetkerleri eshqashan óz klıentterine qońyraý shalyp, telefonyńyzǵa jiberilgen kiltsózdi suramaıdy. Eshkimge jáne eshbir jaǵdaıda ózińizdiń jeke derekterińizdi aıtýǵa bolmaıdy. JSN, kartochka nómirlerin, pın-kodtar men SMS-ter, karta ishki jaǵyndaǵy 3 tańbaly nómirdi eshqashan aıtpańyz. 2 aptada bir ret mobıldi bankıngtegi kodty ózgertip otyryńyz», - dedi basqarma bastyǵynyń orynbasary Oral Rysbaev.