ShQO-da bıyl baspanaly bolǵan kópbalaly otbasylar 2 esege artty

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov óńirdegi kópbalaly analarmen kezdesti. Aımaq basshysynyń bastamasymen qurylǵan kópbalaly jáne az qamtylǵan otbasylarmen jumys jónindegi komıssııa bıznesti bastaý, oqýshylardyń bilim sapasyn arttyrýǵa qatysty suraqtardy talqyǵa saldy, dep habarlaıdy QazAqparat.

Byltyr qurylǵan arnaıy komıssııa óńirdegi kópbalaly jáne az qamtylǵan otbasylardyń máselelerin oblys ákiminiń aldynda ashyq kóteretin birden-bir alańǵa aınaldy. Osydan eki aı buryn ótken jıynda kópbalaly otbasylardan shyqqan túlekterge grant berýde jeńildikter qarastyrý, «Eńbek» baǵdarlamasyna qatysýshylardyń esep-shottaryn buǵattamaý, mektepter men balabaqshalarda arnaıy toptar ashý, bilim ordalaryndaǵy ystyq tamaq pen beriletin kıim sapasyn tekserý sııaqty máseleler kóterilgen edi. Búginde bul máselelerdiń deni óz sheshimin tapqan.

«Mektepter men balabaqshalarda kópbalaly jáne az qamtylǵan otbasylarynyń balalary úshin uzartylǵan toptar ashý boıynsha taldaý júrgizildi. Oblysta mundaı qajettilik 201 mektepte baıqalyp otyr. Balalardyń tizimi de jasaqtalǵan. Epıdemıologııalyq jaǵdaı jaqsarǵannan keıin toptar ashylyp, óz jumysyn bastaıdy», - dedi oblystyq bilim basqarmasynyń basshysy Saırangúl Jumadilova.

Oblys kóleminde bul sanattaǵy otbasylardy qoldaýǵa baǵyttalǵan keshendi jospar sheńberinde bıyl baspanamen qamtamasyz etý kórsetkishi eki esege artqan. Máselen, ótken jyly 500-den astam kópbalaly analarǵa jańa páter kilti tabystalsa, bıyl jyl sońyna deıin 1044 januıa qonys toıyn toılaıdy. Osy rette aıta ketý kerek, sońǵy úsh jylda úı kezeginde turǵan otbasylar sany 900-den 2500-ge deıin artqan.

Sondaı-aq Danıal Ahmetov «Eńbek» baǵdarlamasy boıynsha bólinetin grant qarajatyn buǵattalmaıtyn esep-shotqa túsirý máselesi qazirgi tańda quzyrly mınıstrlik pen Ulttyq banktiń talqylaýynda ekenin jetkizdi.

«Jalpy bıyl «Eńbek» baǵdarlamasy boıynsha beriletin granttardyń 47%-yn kópbalaly jáne az qamtylǵan otbasylar aldy. ıAǵnı, 869 otbasyna óz kásibin bastaý úshin 482 mln teńge qarajat bólingen», - dedi ShQO ákimá.

Sonymen qatar kópbalaly analar qazirgi tańda qashyqtan berilip jatqan bilim sapasyna alańdaıtyndyqtaryn jetkizdi. Sondyqtan kezeń-kezeńimen synyptardy ashyp, balalarǵa mektepte bilim alýǵa ruqsat berýdi surady. Buǵan oraı aımaq basshysy bilim basqarmasyna usynys daıyndaýdy tapsyrdy. Danıal Ahmetov osy suraqty aldaǵy aıdyń sońynda komıssııamen birge taǵy bir márte talqylaıtynyn aıtty.

Kezdesý sońynda analarǵa belsendi qyzmeti úshin QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa atynan alǵys hattar tabys etildi.