ShQO-da bıyl aýany lastaıtyn zııandy shyǵaryndylar 3,2% azaıdy – Zúlfııa Súleımenova

ÓSKEMEN. QazAqparat –Shyǵys Qazaqstan oblysyna jumys saparymen kelgen QR Ekologııa jáne tabıǵı resýrstar mınıstri Zúlfııa Súleımenova bıyl óńirdegi kásiporyndardyń aýany lastaıtyn zııandy shyǵaryndylary 3,2%-ǵa azaıǵanyn málim etti, dep habarlaıdy QazAqparat tilshisi.

QR Ekologııa jáne tabıǵı resýrstar mınıstri Óskemende jergilikti BAQ ókilderine baspasóz máslıhatyn ótkizdi. Onyń aıtýynsha, ShQO — aýany lastaıtyn shyǵaryndylar kólemi boıynsha elimizdegi eń aldyńǵy qatardaǵy óńirlerdiń biri.

«Respýblıka boıynsha lastaýshy zattar shyǵaryndylarynyń kólemi osy jyldyń 1 toqsanynda 401,08 myń tonnany qurady. Onyń ishinde Shyǵys Qazaqstanda – 13,1 myń tonna. Bul byltyrǵy kezeńmen salystyrǵanda 3,2%-ǵa tómen. Buǵan tabıǵatty qorǵaý sharalaryn júzege asyrý arqyly qol jetkizilip otyr», - deıdi Zúlfııa Súleımenova.

Óńirdegi ekologııalyq problemalardy sheshý úshin arnaıy qurylǵan jol kartasynda 35 shara kózdelgen. Qazirgi ýaqytta onyń 3-i oryndaldy.

«Oblystaǵy negizgi máseleler – qaldyqtardy basqarý ınfraqurylymynyń nasharlyǵy, qatty turmystyq qaldyqtar polıgondarynyń bekitilgen normalarǵa sáıkes kelmeýi, ruqsat etilmegen polıgondardyń kóptigi. Aımaq halqynyń 60%-y qatty turmystyq qaldyqtardy jınaý jáne áketý qyzmetterimen qamtylǵan. Qaldyqtardy bólek jınaý jáne suryptaý 2 eldi mekende júrgiziledi. Ǵarysh arqyly monıtorıng jasaýdyń arqasynda 2022 jyly Shyǵys Qazaqstan 241 beı-bereket tastalǵan qoqys úıindisi anyqtaldy. Onyń shamamen 79%-y joıyldy», - deıdi mınıstr.