ShQO-da «Birqabatty Shyǵys» baǵdarlamasy aıasynda 735 jer úı salynyp jatyr
ShQO ákimdiginiń málimetine súıensek, óńirlik baǵdarlama birinshi kezekte qalalar men aýdandardaǵy kópbalaly jáne turmysy tómen otbasylardy qoldaýǵa baǵyttalǵan.
Oblysta qurylys jumystarynyń qarqyndy júrgizilip jatqanyna qaramastan atalǵan sanattaǵy azamattar arasynda baspanaǵa muqtajdar áli kúnge deıin az emes. «Birqabatty Shyǵys» baǵdarlamasy şeńberinde jeke ınvestorlardan 16 mlrd teńge tartylǵan. Osylaısha, qazirgi ýaqytta 735 jer úı salynyp jatyr.
Turǵyn úılerdiń jalpy aýdany 105,9 myń sharshy metrdi quraıdy. Sonymen qatar memlekettik qarajat esebinen kommertsııalyq turǵyn úıler salynyp jatqan aýmaqtarǵa ınjenerlik kommýnıkatsııalar tartylýda.
Ótken jyly osy baǵdarlama boıynsha 106 myń sharshy metr jeke turǵyn úı salynǵan.
Esterińizge sala ketsek, osyǵan deıin ShQO-da ınvestorlar esebinen 82 kópqabatty úı salynyp jatqanyn habarlaǵan edik.