ShQO-da «Birqabatty Shyǵys» baǵdarlamasy aıasynda 300-den astam úı salynady
ShQO ákimdiginiń málimetine súıensek, óńirde «Birqabatty Shyǵys» baǵdarlamasy óz jalǵasyn tabýda. Bıyl sonyń aıasynda oblys aýmaǵynda 316 úı salynbaq. Onyń ishinde 71-i qurylysy byltyr bastalǵan úıler. 152 jer úı qalalarda boı kóteredi.
«Osy baǵdarlama boıynsha kópbalaly otbasylarǵa jáne áleýmettik turǵyda osal sanatyndaǵylarǵa, onyń ishinde jetim balalar men ata-anasynyń qamqorlyǵynsyz qalǵan balalarǵa úı beriledi. Aýdandarǵa qatysty aıtar bolsaq, Zaısan aýdanynda – 25 úı, Kúrshim aýdanynda – 14, Glýbokoe aýdanynda – 7, Ulan aýdanynda – 11, Tarbaǵataı aýdanynda – 9, Shemonaıha aýdanynda – 2, Samar aýdanynda – 3. Úılerdiń sapasyna, ádemi bezendirilýine erekshe nazar aýdarý qajet», - dedi oblys ákimi Danıal Ahmetov.
Onyń aıtýynsha, qala, aýdan ákimderi memlekettik arhıtektýralyq-qurylys baqylaý basqarmasynyń qyzmetkerleri qol qoımaı turyp, úılerdi paıdalanýǵa qabyldamaýy tıis.
«Dárigerler men muǵalimderge de «Birqabatty Shyǵys» baǵdarlamasy boıynsha turǵyn úı beriledi. Prezıdent Qasym-Jomart Toqaevtyń «Aýyldyq densaýlyq saqtaýdy jańǵyrtý» jónindegi tapsyrmasyna sáıkes, oblys aýmaǵynda 36 jańa medıtsınalyq mekeme boı kóteretin aýyldarda úıler salamyz. Sondaı-aq eldi mekenderdi ınternetpen qamtamasyz etý máselesin sheshýdi jalǵastyryp jatyrmyz. 2023 jyly 73 eldi mekenge ınternet tartylady», - dedi aımaq basshysy.