ShQO-da bir kúnde 39 dala órti boldy

ÓSKEMEN. QazAqparat – Shyǵys Qazaqstan oblysynda bir kún ishinde 39 dala órti aýyzdyqtaldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda dala órti jıilep ketti. Tek sońǵy táýlikte oblys boıynsha 39 órt shyqqan.

Máselen, Semeı qalasyndaǵy Sovetskaıa kóshesinde turatyn azamat óz ýchaskesinde órt qaýipsizdigi erejelerin buza otyryp ot jaqqan. Sonyń saldarynan jalyn kórshi aýmaqqa tarap ketti. Tilsiz jaý sharýashylyq qora-jaıǵa jáne 40 sharshy metr aýmaqta qurǵaq shópke jaıyldy.

«Oqıǵa ornyna órt sóndirýshiler shuǵyl kelip jetti. Kóp uzamaı ot tolyqtaı óshirildi. Órt qaýipsizdigi erejelerin saqtamaǵan er adamǵa QR ÁQBtK-niń 336-baby boıynsha 61 260 teńge somasynda aıyppul salyndy», - delingen aqparatta.

Aıta keteıik, sáýir aıynyń basynan beri oblystyń barlyq derlik aýdandarynda dalada órt shyqqan.