ShQO-da bir tsentner balyqty zańsyz aýlaǵan brakoner 400 saǵattyq qoǵamdyq jumysqa jegildi
ShQO boıynsha QAJ departamenti baspasóz qyzmetiniń málimetine súıensek, Kúrshim aýdanynyń turǵyny Zaısan kólinde zańsyz balyq aýlaǵan.
Ol 2 aý quryp, jalpy salmaǵy 104 keli, atap aıtqanda 35 keli kókserke men 69 keli taban balyǵyn aýlady. Sóıtip oǵan qatysty KR QK-niń 335-baby 1-bóliginiń 1-tarmaǵyna sáıkes qylmystyq is qozǵalǵan. Tergeý amaldary aıaqtalǵan soń is sotqa jetti.
«Sot sheshimimen aıyptalýshy kináli dep tanylyp, balyq aýlaý qyzmetimen aınalysý quqyǵynan 1 jyl merzimge aıyryla otyryp, 400 saǵattyq qoǵamdyq jumysqa tartyldy. Qazirgi ýaqytta atalǵan azamat Kúrshim aýdandyq №1 probatsııa qyzmetiniń esebine alynyp, úkim boıynsha taǵaıyndalǵan qoǵamdyq jumysyn atqarýda», - delingen aqparatta.
Er adam bekitilgen aımaqta tazalyq jumystarymen aınalysyp, kóshe sypyrýda.
Eske salsaq, osyǵan deıin Óskemende spırtti asa iri kólemde zańsyz jetkizýmen aınalysqan toptyń joly kesilgeni habarlanǵan.