ShQO-da bıyl kásipkerlerdiń quqyǵyn buzǵan 30 laýazymdy tulǵa jaýapqa tartyldy
Oblys prokýrory Almat Baısholaqovtyń tóraǵalyǵymen kásipkerlerdiń quqyǵyn qorǵaý jónindegi eksperttik keńestiń kezekti otyrysy ótti. Onda jyl kóleminde atqarylǵan jumystardyń nátıjeleri aıtyldy.
«2023 jyly 2,7 myńnan astam kásipkerdiń quqyǵy qorǵalyp, 30 laýazymdy tulǵa jaýapqa tartyldy. Kásipkerlik qyzmetke zańsyz aralasqany jáne tekserý júrgizý tártibin buzǵany úshin memlekettik organdardyń qyzmetkerlerine qatysty 9 ákimshilik is qozǵalyp, 22 zańsyz tekserý toqtatyldy. Máselen, Óskemen qalasy ákimdiginen tasymaldaýshy kompanııalarǵa 700 mln teńge sýbsıdııa, 350 kásipker aldynda memlekettik satyp alý boıynsha 500 mln teńgeden astam bereshek óteldi», - dep habarlady ShQO prokýratýrasynyń baspasóz qyzmeti.
Keńeste talqylanǵan negizgi másele – astyq jınaýǵa áser etken aýa raıynyń qolaısyzdyǵyna baılanysty aýyl sharýashylyǵy salasyndaǵy bıznes ókilderine qoldaý kórsetý. Ulan, Glýbokoe, Shemonaıha, Altaı aýdandarynda jáne Rıdder qalasynda sharýalar aıtarlyqtaı shyǵynǵa ushyraǵan. Sebebi egistikterde qolda bar daqyldyń jartysynan kóbi qalyp qoıǵan.
«Eksperttik keńes osy jaǵdaıdan shyǵý joldaryn ázirlep, sharýa qojalyqtaryn qoldaý boıynsha josparlanǵan sharalardy sóz etti. Kún tártibindegi taǵy bir ózekti taqyryp – jergilikti atqarýshy organdardyń bos jer ýchaskeleri boıynsha aýktsıondar ótkizý merzimderin buzýy. Bul iske asyrýǵa boljanatyn bıznes jobalarynyń buzylýyna ákep soqtyrady. Ýaqtyly ótkizilmegen aýktsıondar boıynsha prokýratýra qadaǵalaý aktilerin engizdi, kináli memlekettik qyzmetshiler ákimshilik jáne tártiptik jaýapkershilikke tartyldy», - delingen aqparatta.