ShQO-da bıyl 369 kásipkerdiń quqyǵy qorǵaldy

<p><strong>Shyǵys Qazaqstan oblysynda jyl basynan beri 369 kásipkerdiń quqyǵy qorǵalǵan. Bul týraly óńir boıynsha Sybaılas jemqorlyqqa qarsy qyzmet basshysy Denıs Shakenov málim etti, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</strong></p>

- Bıyldan bastap oblysta kásipkerlerdiń quqyqtaryn qorǵaý maqsatynda oblystyq Kásipkerler palatasymen birlesip «Bızneske jol» jobasy iske asyrylýda. Birinshi kezeńde kásipkerlerdiń máselelerin muqııat zerdeleýge jáne olardy tolyq sheshilgenge deıin súıemeldeýge basa nazar aýdarylǵan. Sol ýaqyttan beri 30-dan astam bızneske qatysty naqty problemalyq másele oń sheshilip, óńirdegi 369 kásipkerdiń quqyǵy qorǵaldy, - dedi ol.

Kóp jaǵdaıda qıyndyqtar jer qatynastary salasynda jáne ınfraqurylym obektilerine qosylý barysynda týyndaıdy.

«Mysaly, Altaı qalasynda kásipker bir jyldan astam ýaqyt boıy qala ákimdiginiń jer ýchaskesin aýktsıonǵa qoıýyna qol jetkize almaǵan. Ol sol jerge dúken salǵysy kelgen. Departamenttiń aralasýynan keıin jerge ornalastyrý jobasy bekitilip, jer ýchaskesi aýktsıonǵa qoıyldy. Osylaısha, kásipker 10 mln teńgege sol jer ýchaskesin satyp aldy», - deıdi Denıs Shakenov.

Eske salsaq, osyǵan deıin ShQO boıynsha Sybaılas jemqorlyqqa qarsy qyzmettiń Óskemen qalasyndaǵy mektepterdiń birinde matematıka pániniń muǵalimine 100 mln teńgeden astam jalaqy negizsiz tólenbek bolǵanyn anyqtaǵany jaıly habarlaǵan edik.