ShQO-da bes kún ishinde 20-ǵa jýyq ınternet-alaıaqtyq faktisi anyqtalǵan
ShQO Polıtsııa departamentiniń málimetine sensek, Óskemen qalasynyń 29 jastaǵy turǵyny alaıaqtyq jolmen basqa adamnyń atyna násıe resimdegen. Onyń basqa da qylmystarǵa qatysy bary anyqtalǵan. Qazirgi ýaqytta kúdiktige qatysty Qylmystyq Kodekstiń eki baby boıynsha sotqa deıingi tergeý júrip jatyr.
Budan bólek, Semeı qalasynda áıel adam jalǵa páter beremin dep ınternette habarlandyrý jarııalaǵan. Buǵan sengender oǵan aqsha aýdaryp jiberipti. Alaıda oljaǵa kenelgen alaıaq sol kúıi habar-osharsyz ketken.
«Bes kúnge sozylǵan jedel aldyn alý sharasy barysynda 18 ınternet-alaıaqtyq faktisi anyqtaldy. Sondaı-aq buryn jasalǵan 20-dan astam alaıaqtyq isi ashylǵan», - dep habarlady vedomstvo ókilderi.
Tártip saqshylary óńir turǵyndaryna ınternette óte saq bolýdy, aqparattyń shynaıy ekenine kóz jetkizbeı jatyp ózińiz týraly jeke málimetter men qarjy aýdarýdan aýlaq bolý kerektigin eskertedi.