ShQO-da bes adam mingen kólik muz astyna túsip ketti, bir jolaýshy kóz jumdy

ÓSKEMEN. QazAqparat - Shyǵys Qazaqstan oblysynyń Buqtyrma sý qoımasynda jeńil kólik sýǵa batyp ketti, dep habarlaıdy QazAqparat.

Tótenshe jaǵdaılar mınıstrligi taratqan málimet boıynsha, búgin saǵat 19.44 kezinde Shyǵys Qazaqstan oblysy Samar aýdanyndaǵy Buqtyrma sý qoımasynda qaıǵyly jaǵdaı bolǵan.

Osyndaǵy Qyzyl tý ótkeli mańynda jolaýshylar kóligi sýǵa batyp ketti. Kólikte 5 adam bolǵan.

Saldarynan 1950 jyly týǵan áıel adam sýǵa batyp kóz jumǵan.

Oqıǵa ornyna Shyǵys Qazaqstan oblysy tótenshe jaǵdaılar departamentiniń jeke quramy bardy.

Aıta keteıik, atalǵan jaǵdaı bolǵan aýmaqta muz aıdynyna shyǵýǵa tyıym salynatyny týraly belgi qoıylǵan.

Kún sanap aýa temperatýrasy tómendep keledi, biraq bul kezeńde muz aldamshy ekenin este ustaǵan jón. Osyǵan baılanysty Tótenshe jaǵdaılar mınıstrligi kólikpen muz ústine shyǵý qaýipti ekenin eske salady.

«Kez kelgen sý aıdynyndaǵy muzdyń qalyńdyǵy birkelki emes. Jaǵalaýǵa, qamys pen ósimdik jamylǵysynyń aınalasyna qar jınalady. Avtokólikterdiń qaýipsiz ótýi úshin muz jamylǵysynyń qalyńdyǵy - kem degende 30 sm, júk kóligi úshin avtomobıldiń salmaǵyna baılanysty 70 sm-den kem bolmaýy kerek» deıdi mınıstrliktiń resmı ókili Rýslan Imanqulov.

Tótenshe jaǵdaılar mınıstrligi resmı túrde ruqsat etilgen muz ótkelderi ashylǵanǵa deıin kólikterdiń muz ústimen shyǵýyna qatań tyıym salynatyn eske salady.