ShQO-da «Baqytty otbasy» baǵdarlamasyna qatysýǵa 2 myńǵa jýyq adam ótinish berdi
Bul jaıly aımaq basshysy Danıal Ahmetov Facebook-tegi paraqshasynda jazdy.
«Baqytty otbasy» baǵdarlamasynyń jańa múmkindigin talqylap keńes ótkizdim. Búginde óńir boıynsha baǵdarlamaǵa qatysýǵa 1 860 adam ótinish bergen. Olar kópbalaly jáne tolyq emes otbasylar, erekshe kútimdi qajet etetin balasy bar januıalar. Azamattardyń kóbisi ózgege táýeldi bolǵysy kelmeıdi. Sondyqtan olar jumys istep, kommertsııalyq baspana úshin nesıe tóleýge daıyn. Biz óz tarapymyzdan alǵashqy jarna sertıfıkatynyń somasyn 1,5 mln teńgege deıin jetkizdik», - deıdi ol.⠀
Ákimniń aıtýynsha, ótinish berýshilerge «Birqabatty Shyǵys» baǵdarlamasy usynylyp otyr. Kommertsııalyq úılerdiń baǵasy aıtarlyqtaı óskenimen, bul úılerdiń bir sharshy metriniń quny 140-tan 160 myń teńge aralyǵynda. Osylaısha «Baqytty otbasy» baǵdarlamasyna qatysýshylar úıdi qoljetimdi baǵamen ala alady.
«Birqabatty Shyǵys» baǵdarlamasymen Óskemende 180 úı salynýda. Onyń 106-syna ótinish tústi. Sonymen qatar Semeıde qurylysy júrip jatqan 70 úıdiń 58-ine ótinish bar. Men barlyq qala men aýdan ákimderine ár otbasymen áńgimelesip, eki baǵdarlamanyń ozyq tustary jaıly jiti túsindirýdi tapsyrdym. Adamdar naryqtaǵydan áldeqaıda tómen baǵada sapaly baspana alý usynysyna qýanatynyna senimdimin», - dedi Danıal Ahmetov.⠀
Ótken jyly «Baqytty otbasy» baǵdarlamasyna qatysqandarǵa 2,1 mlrd teńgeniń sertıfıkattary berildi. Sonyń arqasynda 226 otbasy qonys toıyn toılaǵan.