ShQO-da azyq-túlik sapasyn tekserý barysynda birqatar zańsyzdyq anyqtaldy

ÓSKEMEN. QazAqparat – Shyǵys Qazaqstan oblysynda azyq-túlik sapasyna júrgizilgen tekserý kezinde túrli taýarlardan alynǵan synamanyń 23,4%-y talapqa sáıkes kelmeıtini anyqtaldy, dep habarlaıdy QazAqparat tilshisi.

ShQO sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, ótken jylǵy saýda nysandarynda júrgizilgen ónim qaýipsizdigi monıtorınginiń qorytyndysy shyǵaryldy.

Jalpy jyl kóleminde 3900 ónimge, onyń ishinde 2409 tamaq ónimine jáne 1491 halyq tutynatyn taýarǵa synama alynyp, zertteý júrgizildi.

«Ónimderdiń 52,7%-y EAEO-ǵa múshe memleketterde, 26,1%-y alys jáne jaqyn shet elderde, 21,2%-y Qazaqstanda jasalǵan. Tekserý qorytyndysyna sáıkes, 914 taýar synamasy (23,4%) Keden odaǵynyń mindetti tehnıkalyq reglamentterinde kórsetilgen talaptarǵa sáıkes kelmeıtindigi anyqtaldy. Sáıkes emes dep tanylǵandardyń basym kópshiligi, ıaǵnı 90,7%-y ımporttyq ónimder. Qalǵan 9,3%-y otandyq óndiriske tıesili», - delingen aqparatta.

Sáıkessizdikter sanıtarlyq-epıdemıologııalyq baqylaýǵa jatatyn ónimniń árbir tobynda bar.

Negizinen bul ónimdi tańbalaýǵa qatysty bolyp otyr.

«885 synamada saqtaý sharttary, óndirýshiniń ataýy men mekenjaıy, shyǵarylǵan kúni, jaramdylyq merzimi syndy aqparattar kórsetilmegen. Sondaı-aq qoldaný kezinde halyqtyń ómiri men densaýlyǵyna qaýip tóndiretin ónimder anyqtaldy. Monıtorıng barysynda 36 synama organoleptıkalyq, fızıkalyq-hımııalyq kórsetkishter boıynsha sáıkes kelmeıtin bolyp shyqty. Onyń ishinde fortıfıkatsııalanǵan unnyń 8 synamasynda temir men myryshtyń quramy tómen», - delingen habarlamada.