ShQO-da aıyppulyn tólemegen 247 adamnyń kóligi arnaıy turaqqa qoıyldy
ShQO polıtsııa departamenti baspasóz qyzmetiniń málimetine súıensek, polıtseıler óńir aýmaǵynda jol qaýipsizdigin qamtamasyz etý, qylmystardy anyqtaý men zańsyzdyqtyń jolyn kesý maqsatynda «Quqyqtyq tártip» jedel aldyn alý sharasyn júrgizýde.
Sonyń aıasynda jol erejesin buzyp, aıyppulyn tólemegen 247 júrgizýshiniń kóligi QR ÁQBtK-niń 785-babyna sáıkes arnaıy turaqqa qoıylǵan.
Al óndirilgen aıyppuldyń jalpy somasy – 5 762 000 teńge.
«Máselen, tártip saqshylary Óskemen qalasynyń 25 jastaǵy turǵyny tizgindegen «Toıota» markaly avtokólikti toqtatqan. Tekserý kezinde er adamnyń 571 968 teńge mólsherindegi 34 tólenbegen aıyppuly bar ekendigi anyqtaldy. Barlyq zańbuzýshylyqtar QR ÁQBtK-niń 592-baby boıynsha (Jyldamdyqty ruqsat etilgen shekten asyrý) jasalǵan. Osyǵan oraı, boryshkerdiń kóligi aıyppuldy tolyq ótegenshe mamandandyrylǵan turaqqa jetkizildi», - delingen aqparatta.