ShQO-da aıyppuly tólenbegen 42 kólik arnaıy turaqqa qoıyldy

ÓSKEMEN. QazAqparat – Shyǵys Qazaqstan oblysynda 42 boryshkerdiń kóligi aıyppul turaǵyna jetkizildi, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Boryshker» jedel aldyn alý sharasyn júrgizýde.

Bir kún ishinde polıtseıler aıyppul tólemeı júrgen júrgizýshilerden 6 mln teńge óndirip aldy.

Sondaı-aq mamandandyrylǵan turaqqa 42 kólik qoıylǵan.

«Tártip saqshylary Óskemen qalasynyń 25 jastaǵy turǵyny tizgindep kele jatqan «Mercedes» markaly avtokólikti toqtatty. Tekserý kezinde er adamnyń jalpy somasy 350 myń teńgege jetetin «Sergek» kameralarymen avtomatty rejımde tirkelgen 10-nan astam tólenbegen aıyppuly bar ekendigi anyqtaldy», - dedi oblystyq PD bastyǵy Saǵat Mádıev.

Barlyq buzýshylyqtar QR ÁQBtK-niń 592-baby (qozǵalys jyldamdyǵyn arttyrý) boıynsha jasalǵan.

Osyǵan baılanysty boryshkerdiń kóligi aıyppuldardy tolyq ótegenge deıin mamandandyrylǵan turaqqa jetkizildi.