ShQO-da aýyl turǵyndary sheteldik týrısterdi qabyldap, aqsha taba alady
ShQO Týrızm jáne syrtqy baılanystar basqarmasynyń málimetine súıensek, óńirde aýyldyq týrızmdi brıtandyq model boıynsha damytý kózdelgen. Bul modelde týrıster qonaqúıde emes, jergilikti jurttyń úılerinde turyp halyqtyń turmys-tirshiligimen, ádet-ǵurpymen tanysady. Mundaı demalystyń negizgi talaptary - aýyl turǵyndarynyń ómir súrý deńgeıiniń shynaıylyǵy.
«Katonqaraǵaı aýdany aýyldyq týrızmdi damytý úshin óte qolaıly. Qazir osynda 23 demalys orny jumys isteıdi. Onyń ishinde 12 biregeı pantymen emdeý oryndary, bes meımanhana, alty qonaq úı bar. Berel aýylynda 533 adam nemese 141 otbasy turady. Onyń 336-sy ekonomıkalyq belsendi halyq», - dedi basqarma basshysy Marat Qabaqov.
Búginde 27 otbasy týrısterdi qabyldaýǵa daıyn ekendikterin jetkizgen. Olar «Bıznes Bastaý» jobasyna qatysyp, kásipkerlik negizderin úırendi. Qazir «Bıznestiń jol kartasy - 2025» memlekettik baǵdarlamasy boıynsha grant alý úshin konkýrsqa qatysýda.
«Joba oıdaǵydaı iske assa týroperatorlar kelesi jyly týrısterdiń alǵashqy legin Berel aýylyna baǵyttaıdy. 15 qonaq úı bir maýsymda nemese tórt aıda kem degende 700-ge jýyq adamdy qabyldaı alady. Ár otbasy aıyna orta eseppen 540 myń teńge tappaq. Al qazir aýyldaǵy ortasha jalaqy 98 myń teńge», - dedi Marat Qabaqov.