ShQO-da Aýǵan soǵysynda qaza tapqan jaýyngerlerdiń rýhyna taǵzym etildi

ÓSKEMEN. QazAqparat – Shyǵys Qazaqstan oblysynda Aýǵan soǵysynda mert bolǵan jaýyngerlerdiń rýhyna taǵzym etildi, dep habarlaıdy QazAqparat tilshisi.

15 aqpan keńes áskerleriniń Aýǵanstannan shyǵarylý kúnine baılanysty Shyǵys Qazaqstanda birqatar shara ótti. Oblystyq Polıtsııa departamentiniń qyzmetkerleri jaýynger-ınternatsıonalısterge arnalǵan memorıalda soǵysta qaza tapqandardy eske alyp, saltanatty gúl qoıý rásimin ótkizdi.

Al QAJ departamentine qarasty OV-15/14 mekemesinde sporttyq saıys uıymdastyrylyp, aýǵan soǵysynyń ardagerine medal tabys etildi.

«Erjan Qalmaqbaev 1985-1987 jyldar aralyǵynda Kandagar qalasyndaǵy soǵysqa qatysqan. Jarty ǵasyrǵa jýyq ýaqyt ótse de surapyl soǵys áli de túsine kiredi. Keskilesken urysta janynda turǵan joldastaryna oq tıip, olardyń bóten eldiń jerinde jan tapsyrǵandaryn kórgen ardager «Keńes odaǵynyń Aýǵanstandaǵy áskerı operatsııasynyń bastalǵanyna 40 jyl» medalimen marapattaldy», - dep habarlady departamenttiń baspasóz qyzmeti.

Ardager óz sózinde beıbitshiliktiń eń úlken baqyt ekendigin jetkizdi.

«Soǵysta jaýdyń ár túrli qýlyqqa toly is-áreketterin kórdik. Men ózimdi batyr dep eseptemeımin. Óz mindetimizdi shamamyz kelgenshe oryndap keldik. Qazirgi jastar Otanǵa qyzmet etip, beıbit ómirdiń qadirin túsinse eken deımin» - dedi Erjan Qalmaqbaev.