ShQO-da ata-anasy mas jatqanda kishkene bala terezege qystyrylyp qalǵan

ÓSKEMEN. QazAqparat – Shyǵys Qazaqstan oblysy Glýbokoe aýdanynda ata-anasy mas bolyp jatqanda 3 jasar bala terezege qystyrylyp qalyp, bir saǵattaı jylap turdy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, polıtsııaǵa habarlasqan azamat 28 jastaǵy áıeldiń kámeletke tolmaǵan balalaryna qaramaıtyndyǵyn aıtty. Tártip saqshylary muny tekserý úshin kórsetilgen úıge attanǵan.

Olar oqıǵa ornyna jetkende erli-zaıyptylar ishimdikke masaıyp uıyqtap jatty. Al 3 jasar balalary eki terezeniń ortasynda qystyrylyp turǵan.

«Belgili bolǵandaı, búldirshin terezege qystyrylǵan mysyqty alyp shyǵýǵa árekettengen. Alaıda ózi de eki terezeniń ortasyna túsip, 1 saǵattaı jylap turdy. Onyń 4 jastaǵy aǵasy ata-analarynan kómek surap talaı márte aıqaılaǵanymen odan esh nátıje shyqpaǵan», - delingen aqparatta.

Áıel adam bala tárbıesimen durys aınalyspaǵany úshin osyǵan deıin de esepke alynǵan. Atalǵan oqıǵadan keıin erli-zaıypty ata-analyq quqyǵynan aıyrylýy múmkin. Qazirgi ýaqytta balalar Óskemen qalasyndaǵy kámeletke tolmaǵandardy beıimdeý ortalyǵyna ornalastyryldy.