ShQO-da áskerı bólimder aýmaǵynda ornalasqan kásipkerler quqyǵy 62 ret buzylǵan

ÓSKEMEN. QazAqparat – Shyǵys Qazaqstan oblysynda áskerı bólimder aýmaǵynda jumys isteıtin kásipkerlerdiń quqyǵyn buzýdyń 62 faktisi anyqtaldy, dep habarlaıdy QazAqparat tilshisi.

ShQO áskerı prokýratýrasy óńirlik kásipkerler palatasynda áskerı bólimder aýmaǵynda qyzmet etetin kásipkerlermen kezdesý ótkizdi. Jıyn barysynda bıznes ókilderiniń quqyqtaryn qorǵaý maqsatynda qandaı sharalar atqarylyp jatqany aıtyldy.

«Bizdiń jumystaǵy negizgi baǵyt – kásipkerler quqyqtarynyń buzylýyna jol bermeý. Ol úshin arnaıy mobıldi top qurylyp, túsken ótinishterdi barynsha jyldam qarap, tıisti sharalardy qabyldaýda. Máselen, Ulttyq ulannyń memlekettik satyp alý týraly kelisim-sharttary boıynsha zańsyz aıypaqy óndirý faktisi tirkelgen», - deıdi Óskemen garnızonynyń áskerı prokýrory Esjan Sybanbaev

Onyń aıtýynsha, barlyǵy jyl basynan kásipkerler quqyǵyn buzýdyń 62 faktisi anyqtalyp, sharalar qabyldandy.

Kezdesýge qatysqan kásipkerler áskerı bólimder aýmaǵyna ónim jetkizýde jáne as mázirin úılestirýde eshqandaı kedergiler joqtyǵyn aıtty.

Aıta keteıik, quqyǵy buzylǵan óńir kásipkerleri ShQO áskerı prokýratýrasyna 8(7232) 614-072 jáne 8-701-686-21-71 nómirleri arqyly habarlasyp, shaǵymdana alady.