ShQO-da arnaıy operatsııa kezinde gashısh jetkizýmen aınalysqan 4 adam ustaldy

ÓSKEMEN. QazAqparat – Shyǵys Qazaqstan oblysynda gashısh jetkizýmen aınalysqan 4 adam ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, polıtseıler esirtki zattaryn jetkizýdiń eki arnasynyń jolyn kesý maqsatynda arnaıy operatsııa ótkizdi.

«Birneshe kún ishinde óńir aýmaǵyna kanabıoıdty esirtkini ákelý men satýdy uıymdastyrǵan 30-45 jas aralyǵyndaǵy 4 er adam ustalyp, qamaýǵa alyndy.

Olardyń ekeýi gashıshti Óskemen qalasyna, taǵy ekeýi Zaısan aýdanyna jetkizip otyrǵan. Kúdiktilerdiń turǵylyqty jerlerin tintý kezinde shamamen 5 keli gashısh jáne esirtki satýdan túsken qomaqty qarajat tárkilendi», - dedi oblystyq PD bastyǵynyń orynbasary Talǵat Shaıahmetov.

Qazirgi ýaqytta QR QK-niń 293-baby boıynsha tergeý júrgizilýde. 4 er adam 15 jylǵa deıingi merzimge bas bostandyqtarynan aıyrylýy múmkin.