ShQO-da alty jyl buryn bastalǵan Osınov asýynyń joly bıyl taǵy salynyp bitpeıdi
2018 jyly Óskemen-Altaı baǵytyndaǵy Osınov asýynan tóte joldyń qurylysy bastalǵan bolatyn. Bul — óte mańyzdy jol.
Sebebi Altaı aýdanyndaǵy Buqtyrma sý qoımasyna jáne Katonqaraǵaı aýdanyna týrıster tek osy jol arqyly jetedi.
Jol salýshylar baıqaýsyzda orman sharýashylyǵynyń jerine kirip ketkendikten toqtap qalǵan qurylys jumystary 2023 jyly qaıta jalǵasqan edi.
Burynǵy oblys ákimi Danıal Ahmetov jańa jol 2024 jyly salynyp bitetindigin aıtqan.
Alaıda búgin ShQO aımaqtyq kommýnıkatsııalar qyzmetinde ótken baspasóz máslıhatynda qurylystyń bıyl bitpeıtini málim boldy.
«Búgingi tańda 56-dan 72 shaqyrymǵa deıingi ýchaskege baılanysty jobaǵa túzetýler engizilgen. Konkýrs ótkizilip, merdiger kompanııa anyqtaldy. Ol — „Kurylys Group RK“ JShS. Ótken jyly qazan aıynda kelisim jasaldy. Bıyl 3,9 mlrd teńge bólinip, onyń 2,9 mlrd teńgesi ıgerildi. 52-den 53 shaqyrymǵa deıingi aýmaqta jer qazý jumystary júrgizilip jatyr. 72-den 88 shaqyrymǵa deıingi ýchaskege qatysty jobaǵa túzetý engizilýde. Jalpy qurylys jumystary 2025 jyly aıaqtalady dep kútilýde. Sebebi jolda bıik tirekteri bar úlken jáne kúrdeli kópir salynýy tıis», — deıdi ShQO jolaýshylar kóligi jáne avtomobıl joldary basqarmasy basshysynyń mindetin atqarýshy Nurbek Turarov.