ShQO-da «Altaı - túrki áleminiń besigi» halyqaralyq jobasy iske asyryla bastady

ÓSKEMEN. QazAqparat - D.Serikbaev atyndaǵy Shyǵys Qazaqstan memlekettik tehnıkalyq ýnıversıteti (ShQMTÝ) «Altaı - túrki áleminiń besigi» biregeı halyqaralyq jobasyn iske qosty. Bul týraly joǵary oqý ornynyń baspasóz qyzmetinen málim etti, dep habarlaıdy QazAqparat.

Jobanyń maqsaty - kóshpendilerdiń tehnologııalyq damýyna jáne túrki áleminiń qalyptasýyna negiz bolǵan Eýrazııa órkenıetiniń ortalyǵy retinde Altaı týraly bilimdi qalyptastyrýǵa baǵyttalǵan tarıhı sanany jańǵyrtý.

D.Serikbaev atyndaǵy ShQMTÝ rektory Jasulan Shaımardanovtyń aıtýynsha, joba 3 jylǵa eseptelgen jáne ýnıversıtettiń basty mindeti - ǵylymı-tájirıbelik qoldaý kórsetý, ǵylymı turǵydan aqparattardy óńdeý, arheologııalyq qazbalardy taldaý, sondaı-aq stýdentterge ádistemelik materıaldar daıyndaý.

Rektordyń aıtýynsha, «Altaı - túrki áleminiń besigi» jobasy aıasynda Shyǵys Qazaqstan oblysynyń kórikti jáne tarıhı oryndaryn zertteý boıynsha halyqaralyq ekspedıtsııalar uıymdastyrylady, sondaı-aq Altaı óńiriniń (Qazaqstan, Reseı, Mońǵolııa, Qytaı) stýdentterine XVII halyqaralyq jazǵy mektep ótkiziledi.  

«Murajaıdaǵy jádigerlerdi tsıfrlandyrý jobasyn iske asyrý kezinde biz oblystyń týrıstik ortalyqtaryndaǵy murajaı ekspozıtsııalaryn saqtaý jáne ony kóbeıtý maqsatynda tabylǵan artefakttardy tsıfrlaýdy josparlap otyrmyz. Ýnıversıtet qazba jumystaryna tehnıkalyq qoldaý kórsetedi», - dedi rektor.

Budan bólek, mektep oqýshylary úshin turaqty túrde ekskýrsııalar ótkizilmek. 

Atalmysh joba «Altaı - túrki áleminiń besigi» halyqaralyq ǵylymı-tájirıbelik konferentsııadan bastaý aldy. Onyń aıasynda sheberlik sabaqtar, «Úlken Altaı» ShQMTÝ mýzeıiniń prezentatsııasy ótkizildi.