ShQO-da áleýmettik nysandardyń 98 paıyzy jylýǵa qosyldy
Aımaq basshysy Danıal Ahmetov jylytý maýsymyna qatysty jıyn ótkizdi. Búgingi tańda oblystaǵy barlyq áleýmettik nysandardyń 98 paıyzy jylýǵa qosylǵan. Alaıda Semeıdegi segiz bilim berý nysanyn jylýmen qamtýda qıyndyq týyndady.
«Buǵan jylý magıstralindegi aqaýlar sebep bolyp otyr. Erteńnen bastap másele sheshilip, olardyń barlyǵy jylýmen qamtamasyz etile bastaıdy. Jalpy, Semeı boıynsha úlken jumystar atqaryldy. Mamyr aıynan bastap qazandyqtardy jóndeý, olardyń qýatyn arttyrý, tehnıkalyq bazany nyǵaıtý jumystary júrgizildi. Endi qala ákimi óz isine jaýapkershilikpen qarap, áleýmettik nysandar men turǵyn úı sektorlarynyń jylýmen qamtamasyz etilýin turaqty baqylaýǵa alýy tıis», - dedi oblys ákimi.
Onyń aıtýynsha, búginde óńir boıynsha 637 densaýlyq saqtaý nysanynyń 635-i jylýǵa qosylǵan. Al aýdandar boıynsha áleýmettik nysandarda qajetti otyn qory jetkilikti.