ShQO-da aldaǵy úsh jylda 33 mektep boı kóteredi

ÓSKEMEN. QazAqparat – Shyǵys Qazaqstan oblysynda aldaǵy úsh jylda 33 mektep salynbaq. Bul jaıly búgin Óskemen qalasynyń turǵyndarymen kezdesken óńir basshysy Danıal Ahmetov málim etti, dep habarlaıdy QazAqparat tilshisi.

«Bilim ordalaryndaǵy oryn tapshylyǵyn azaıtý maqsatynda aldaǵy úsh jylda qalanyń soljaǵalaý bóliginde 4330 oryndyq 6 mektep salynady. Jalpy oblys boıynsha 33 mektep boı kóteredi. Bıyl bilim berý mekemelerin jóndeýge 1,7 mlrd teńge bólingen», - dedi aımaq basshysy.

Kezdesý barysynda baıandama jasaǵan qala ákimi Jaqsylyq Omardyń aıtýynsha, shaharda orta arnaýly bilim alatyn jastardyń turýyna jaǵdaı jasaý maqsatynda qurylys kolledji men kópbeıindi tehnologııalyq kolledjdiń eki jataqhanasynyń qurylysy aıaqtalady.

«Mektepke deıingi balalar uıymdaryna kezekti azaıtý úshin Sátbaev dańǵylynda 150 oryndyq «Aqbota» balabaqshasy ashylady. Sondaı-aq Protozanov kóshesi 37a jáne Kosmıcheskaıa kóshesi 6/3 mekenjaılarynda ornalasqan ǵımarattar kommýnaldyq menshikke qaıtarylyp, balabaqsha retinde qaıta jańǵyrtylady», - dedi ol.