ShQO-da aldaǵy 4 jyl ishinde kezekte turǵan barlyq otbasylar baspanaly bolady
Bul jóninde oblystyq ákimdikte ótken kópbalaly otbasylardy baspanamen qamtamasyz etý máselelerin sheshý jónindegi oblystyq qoǵamdyq komıssııanyń otyrysynda belgili boldy.
Osyǵan oraı, atalǵan oblystyq qoǵamdyq komıssııa aǵymdaǵy jyldyń mamyr aıynda qurylyp, onyń quramyna memlekettik organdardyń, qoǵamdyq uıymdardyń, buqaralyq aqparat quraldarynyń ókilderi jáne eń bastysy, sol kópbalaly analardyń ózderi de kirgen bolatyn.
Qazirgi ýaqytta Shyǵys Qazaqstanda úsheýden kóp bala tárbıelep otyrǵan 26 myńnan asa otbasy turady. Olardyń áleýmettik máselelerin sheshý úshin oblysta olardy qoldaýdyń úsh deńgeıli arnaıy baǵdarlamasy qabyldanǵan. Kómekke muqtaj barlyq kóp balaly analar qalalyq jáne aýyldyq bolyp eki topqa bólingen.
Óńirde turǵyndardyń osy sanatyna baspana satyp alý úshin bıýdjettik emes qarjy kózderinen, sonyń ishinde oblystyq qaıyrymdylyq «Paryz» qorynan 558 mıllıon teńge qarjy kózdelgen. Qor qarjysy esebinen oblystyq barlyq aýdandarynda 231 otbasy óz úılerine qol jetkizgen.
Baǵdarlamanyń ekinshi kezeńinde kezekte turǵan qalǵan otbasylardy turǵyn úımen qamtý qarastyrylǵan.
Oblystyq qurylys, sáýlet jáne qala qurylysy basqarmasynyń basshysy Baýyrjan Qudııarovtyń bergen derekterine sáıkes bıylǵy qyrkúıekke deıin 368 otbasy óz baspanalaryna qol jetkizgen bolsa, jyl sońyna deıin taǵy 143 otbasy qonys toıyn toılamaq. Sonda aǵymdaǵy jyly 511 kópbalaly jáne az qamtylǵan otbasy óz baspanalaryna qol jetkizetin bolady.
Sonymen qatar aımaq basshysy Danıal Ahmetov «Baqytty otbasy» baǵdarlamasynyń aıasynda kópbalaly otbasylar úshin turǵyn úı qurylysynda tórt bólmeden turatyn, aýdany 100 sharshy metrlik, quny – 13,5 mln teńge bolatyn, bir qabatty tıptik jobany iske asyrýdy usyndy. Baspanalar «Turǵynúıqurylysjınaqbanki» AQ usynyp otyrǵan ıpotekalyq nesıe baǵdarlamasynyń shartyna sáıkes jyldyq eki paıyzben 20 jyl merzimge berilmek. Nesıeniń eń joǵarǵy mólsheri – 10 mln teńge kóleminde bolsa, alǵashqy jarna 10 paıyz bolmaq.
Búgingi tańda óńirde 128 otbasy «Turǵynúıqurylysjınaqbanki» AQ-na jeńildetilgen nesıelendirýge ótinim bergen. Al bir mıllıon teńgege deıingi jınaq qarjysy joq otbasylar úshin alǵashqy jarna bıýdjettik qarjy esebinen toltyrylady. Bul maqsatqa qyrkúıek aıynda ótken oblystyq máslıhattyń sessııasynda 70 mln teńge bólingen.
Sonymen qatar óńir basshysy alǵashqy jarnaǵa jetpegen qajetti qarjyny aımaqtaǵy bıznes-sektordyń ókilderi de usyna alatyndyǵyn málimdedi. Sondyqtan, bul másele boıynsha kásipkerlermen tıisti jumystar júrgiziledi. Alaıda, aýdandaǵy komıssııalar otbasylar týraly aqparattyń jarııalylyǵyn, obektıvtiligin, kezekte turý jaǵdaıyn naqty anyqtaýy qajet.
«Osylaı etý arqyly biz aldaǵy tórt jyldyń ishinde Memleket basshysy Qasym-Jomart Toqaevtyń alǵa qoıyp otyrǵan kópbalaly otbasylardy baspanamen qamtamasyz etý týraly tapsyrmasyn tolyǵymen oryndaıtyn bolamyz. Taǵy da qaıtalap atap ótemin, bizdiń oblysta kópbalaly jáne az qamtylǵan otbasylardyń áleýmettik jaǵdaılaryn sheshýge barlyq jaǵynan tolyq qoldaý kórsetiletin bolady», – dedi oblys ákimi Danıal Ahmetov.
Aqparat retinde aıtar bolsaq, «Baqytty otbasy» ıpotekalyq nesıeleý baǵdarlamasy boıynsha Óskemen, Semeı, Rıdder, Shemonaıha, Aıagóz, Kýrchatov qalalarynyń turǵyndaryna óz baspanalaryn rásimdeý múmkindigi bar.