ShQO-da adasyp ketken 3 shopan qutqaryldy

ÓSKEMEN. QazAqparat – Shyǵys Qazaqstan oblysynda adasyp ketken 3 shopan qutqaryldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 4 qarasha kúni saǵat 14.00 shamasynda Zaısan aýdanynda 3 shopannyń bir otar qoımen joǵalyp ketkeni týraly habar tústi. Belgili bolǵandaı, tańerteń Birjan aýyldyq okrýgi aýmaǵyndaǵy qystaqtan shyqqan olar sol kúıi qaıtyp oralmaǵan.

«Qutqarýshylar oqıǵa ornyna shuǵyl kelip, izdestirý sharalaryna kiristi. Nátıjesinde, otar qoımen dalada adasyp júrgen shopandardyń biri tabyldy. 2 saǵattan keıin qutqarýshylarǵa ekinshi malshy jolyqty. Kóp uzamaı úshinshi er adam da aman-esen tabylǵan», - delingen aqparatta.

TJD qyzmetkerleri shopandardy ótimdiligi joǵary «KÝNG» tehnıkasymen qystaqqa jetkizdi. Olardyń densaýlyqtaryna eshqandaı zaqym kelmegen.